احكي لي عن بلاد بعيدة ...فيها الناس بتحلم و بتلاقي أحلامها تتحقق...احكي عن ناس بتسامح و بتنسى ..احكي لي عن ناس بتبتسم ..عشان تبتسم !...احكي لي عن الحصنة البيضا اللي بجناحين ...و عن البنت اللي اتجوزت حبيبها ...احكيلي عن التبات و النبات ...و ضحكة الصبيان و فرحة البنات ...احكي لي عن ريحة الليمون و اليوسفي في ايد ست عجوزة طيبة ...احكي لي عن نسمة ساعة الفجرية بتشاور عقلها تبرد الجو و لا تسيبه...احكي لي عن حطاب ماشي في الغابة و صياد على شط البحر و فارس فوق حصانه يدافع عن الفقير و ينصر الغلبان ....احكي لي عن نبع الشباب ..و اكسير الحياة ...و راحة القلوب ....احكي لي عن لون الخوخ في خدود البنات و طعم الكريز في شفايفهم.....احكي لي عن شاعر و رسام ...احكي لي عن الجمال و الحق و الخير....احكي لي عن العدل ....احكي لي عن أم و ولادها جنبها مهما كبروا ...عن أب وابنه بيحكوا و يتحاكوا زي الصحاب ....احكي لي عن الرضا ...احكي لي عن حب الناس...احكي لي عن الأمل....احكي لي عن جرة الدهب على طرف قوس قزح ...احكي لي عن ناس سابت الدهب و عشقت الألوان ....احكي لي مزيكة الشلال و الريح مع الشجر و حضن الندى للوردة ساعة الصبح ....احكي لي عن شمس دفا و خير ...و قمر نور و سكينة...احكي لي عن ناس غير الناس ...و دنيا غير الدنيا ....
احكي لي....و أنا هاصدق....و اللهي هاصدق...بس احكي لي ! .
Comments
Post a Comment